Subah subah ki baat thi
Jab suraj bhi ubasi le raha tha
Gadgadate baadlon ke peeche baithe
…Aur kuch boondien chhoot gayi
Baadal itne mashroof they apni behes mein
Aasmaan tab syahi jaisa hi tha
Puhkraj sa kuch khul raha tha ek kone mein
Aisi sard si subah thi kuch
Jab haathon mein tera haath tha.
Machalte patton se oos ki boondien fisal rahi thi
Paed ki shaakho mein thi hulchul
Chidiyaon ka chehekna, gilheriyo ka khilkhilana
Kaafi khusnuma tha mahaul, aakhir pehla peher tha
Aisi madhosh si subah thi kuch
Jab haathon mein tera haath tha.
Angdayi leta hua kohra jhoom raha tha
Aalass mein dooba badd raha tha
Dhuli hui hariyali mein alag si taazgi thi
Gungunate jharno mein alag si lachak thi
Aisi jannat si subah thi kuch
Jab haathon mein tera haath tha
Boondon ka rukh badal raha tha
Baadlon ka mijaz bhi kuch badal raha tha
Phir se foot raha tha ufaq ki dehleej par saawan
Kuchal kar subah ki kiran ko jhagad raha tha
Aise mein hum diwane do sarr par panni daale
Nikal pade the seher ki sair karne, bina manzil ki fikar kiye…
Geeli ghaas par chhapp chhapp karke koode
Jhukte paedo se saeb tod ke khaaya
Beas ki lehro par patthar phenke
Ek doosre par paani ucchaala
Pahadi ke neeche vaadi par
Dhunnd ki bheed jami thi
Ek bhoola sa kamra yun hi khada tha
Jise aashiyan banane ki soch kar humne aasra liya tha
Deewaron par seelan thi,
Aur chhatt par kachchi chaadar
Par garmaish thi apne saanson ki
Aur kuch unn kapde ki boriyon ki
Jinhe odd ke hum baithe they tooti khidki tale
Boondon ko thaamte hue
Khwabo ko choomte hue
Duaon ko maangte hue
Mohabbat ko jaante hue…
Aisi khoobsurat si subah thi kuch
Jab haathon mein tera haath tha.
Pagdandiyon mein kadmo ke nishaa the
Shayad hamare hi the pichhli shaam ke
Har kadam par chaar kadam
Yun to hamare hi ho sakte the…
